Að hlaða rafbílinn heima

Veitur taka þátt í stórfelldri uppbyggingu innviða fyrir rafbílaeigendur á höfuðborgarsvæðinu. Áður en ákveðið er hvernig hlaða skal rafbílinn heima er mikilvægt að skoða uppsetningu hleðslulausna. Hér má finna góð ráð og upplýsingar þess efnis.

Við mælum með fasttengdum hleðslustöðvum, svokallaðri „hleðsluaðferð 3“, við hleðslu raf- og tengiltvinnbíla. Við mælum ekki með notkun hefðbundinna rafmagnstengla til hleðslu að staðaldri. Sá búnaður er einungis ætlaður til skamms tíma í senn og ætti því ekki að nota til hleðslu rafbíla nema búið sé að takmarka hleðslustrauminn verulega.

Kostir fasttengdra hleðslustöðva:

  • Hraðvirkari og öruggari hleðsla
  • Hægt að fá bæði einfasa og þriggja fasa
  • Hægt að fá bæði með áföstum eða lausum hleðslukapli
  • Hægt að tengja stöðvar saman
  • Hægt að fá með álagsstýringu

Hvað er hleðsluaðferð 3?

Hleðslustöðin er fasttengd með áföstum hleðslukapli eða með tengi fyrir lausan hleðslukapal. Hleðslustöðin er ýmist fest á vegg eða staur og býður upp á hraðvirkari hleðslu. Hleðsla rafbíla krefst mikils afls og oft yfir langan tíma. Fasttengd hleðslustöð er því öruggasta leiðin við hleðslu raf- og tengiltvinnbíla þar sem hægt er að tryggja að raflagnir uppfylli kröfur um afl og að tengingar séu góðar. Einnig er ekki möguleiki á að rjúfa hleðslu undir álagi.