Glæsileg starfsstöð Veitna á Vesturlandi tekin í notkun

23. september 2021 - 15:53

Ný starfsstöð Veitna við Lækjarflóa á Akranesi var opnuð formlega í dag. Nýja byggingin er um 1000 fm að stærð og gjörbyltir allri vinnuaðstöðu starfsfólks á Vesturlandi en það hefur undanfarin fjögur ár unnið í skrifstofurými í gámum eftir að mygla kom upp í húsnæði þess.

Húsið skiptist í skrifstofuhluta og verkstæðishluta.  Í skrifstofuhlutanum eru skrifstofur, vinnuherbergi og fundaraðstaða auk kaffiaðstöðu fyrir starfsmenn og búningsherbergja.  Verkstæðishlutinn skiptist í lager og almennt verkstæði annars vegar, með snyrtingu, hleðslurými fyrir lyftara og inntaksrýmum.  Hins vegar er aðstaða fyrir fráveitu til þrifs og viðgerða á búnaði, með tilheyrandi búnings-og þvottaaðstöðu.  Þá er einnig tækjageymsla sem er aðgengileg utanfrá.  Innangengt er á milli skrifstofuhluta og lager-og verkstæðishluta.  Fráveituhluti og tækjageymsla eru einungis aðgengileg utanfrá.

Húsið er byggt úr smellin forsteyptum einingar lausnum frá BM Vallá  á Akranesi og  Límtrés burðarvirki ásamt yleiningum fyrir iðnaðarhluta koma frá Límtré Vírnet.

Í tilefni opnunarinnar var opið hús þar sem starfsfólki OR samstæðunnar og bæjaryfirvöldum á Akranesi gafst kostur á að skoða nýju bygginguna.

Á myndinni, sem tekin var í opnu húsi, eru Guðrún Erla Jónsdóttir, formaður stjórnar Veitna, Gissur Þór Ágústsson, sérfræðingur í veiturekstri, Sævar Freyr Þráinsson, bæjarstjóri á Akranesi og Gestur Pétursson, framkvæmdastjóri Veitna.

Mynd: Magnús Magnússon/Skessuhorn

Stafrænt kolefnisspor þessarar fréttar/greinar er áætlað 0,2 til 1,0g CO₂ ígilda á hverja heimsókn.