Hamrahlíð lokað á fimmtudag klukkan 14:00

10. júlí 2018 - 15:25

Þessi frétt verður uppfærð eftir því sem framkvæmdum vindur fram.

 

Uppfært 25. júlí 2018

Til stóð að opna fyrir umferð frá Kringlumýrarbraut inn í Hamrahlíð á morgun fimmtudaginn 26. júlí. Því miður frestast sú opnun þar sem ekki næst að malbika gatnamótin fyrr en á föstudag og opnað verður fyrir umferð laugardaginn 28. júlí, 

Uppfært 10. júlí 2018

Vegna endurnýjunar á aðalæð vatnsveitu Veitna verður Hamrahlíð lokað við Kringlumýrarbraut klukkan 14:00 fimmtudaginn 12. júlí. Lokunin mun standa í um tvær vikur.

Vegna þessa mun akstur á leið 13 hjá Strætó raskast. Nokkrar biðstöðvar verða óvirkar og hægt er að sjá nánari upplýsingar um það ásamt korti eru hér á vef Strætó. Almennar ökuleiðir breytast líka og þarf að fara aðrar leiðir inn í hverfið og út úr því. Þær helstu eru um Litluhlíð, sem tengist Bústaðavegi,  og Lönguhlíð, sem tengist Miklubraut.

Veitur eru að leggja svera vatnslögn frá dælustöð við Stigahlíð, meðfram Kringlumýrarbraut að Bústaðavegi. Samhliða leggur Reykjavíkurborg hjóla- og göngustíga og reisir hljóðvegg meðfram byggðinni við Stigahlíð sunnan Hamrahlíðar. Verkið hófst fyrir um mánuði og nú er komið að því að leggja lögnina undir Hamrahlíð. Helstu hagsmunaaðilum á svæðinu hefur verið gert viðvart um lokunina.

Uppfært 19. júní 2018

Verktaki Veitna er að koma sér fyrir á framkvæmdasvæðinu og áætlar að hefja framkvæmdir á morgun, 20. júní. Við minnum vegfarendur á að gæta varúðar þegar þeir eru á ferð við framkvæmdasvæðið. 

--------

Upphafleg frétt 7. júní 2018:

Í byrjun næstu viku hefjast framkvæmdir á vegum Veitna og Reykjavíkurborgar vegna endurnýjunar á stofnlögn vatnsveitu, gerð hjóla- og göngustíga og hljóðveggjar meðfram Kringlumýrarbraut vestanverðri, á kafla milli Miklubrautar og Bústaðavegar. Framkvæmdir munu standa fram á haust.

Byrjað verður næst Miklubraut. Um miðjan júlí þarf að loka Hamrahlíð í um tvær vikur en þá verður vatnslögnin lögð undir götuna og tengd öðrum lögnum sem þar eru. Nánari tímasetning þess verður kynnt þegar nær dregur. Meðan á lokuninni stendur þarf að fara aðrar leiðir inn í hverfið og út úr því. Þær helstu eru um Litluhlíð, sem tengist Bústaðavegi,  og Lönguhlíð, sem tengist Miklubraut.

Viðbúið er að þrengja þurfi Kringlumýrarbraut til suðurs um eina akrein öðru hvoru meðan á framkvæmdinni stendur. Miklabraut er alveg utan framkvæmdasvæðisins.

Hvað Veitur varðar er verkið þáttur í mikilli endurnýjun stofnæða vatnsveitunnar með þann tilgang að auka rekstraröryggi vatnsveitunnar og koma til móts við aukna þörf á köldu vatni í vesturhluta borgarinnar, m.a. til brunavarna. Haldið verður áfram sumarið 2019 með kaflann sunnan byggðarinnar við Stigahlíð.

Þessa framkvæmd nýtir Reykjavíkurborg til að endurnýja göngu- og hjólastíga meðfram Kringlumýrarbraut. Jafnframt verður reistur hljóðveggur meðfram byggðinni við Stigahlíð til að draga úr ónæði þar vegna umferðar.

Eins og jafnan þurfa vegfarendur – hvaða ferðamáta sem þeir hafa – að gæta varúðar við framkvæmdasvæðið og fara að merkingum sem settar verða upp, þar á meðal um hjáleiðir. Sérstakar merkingar verða fyrir hjáleiðir akandi umferðar, hjólandi og gangandi.