Kuldakastið reynir á hitaveituna

29. janúar 2019 - 20:11

Veitur hafa virkjað viðbragðsáætlun í rekstri hitaveitunnar vegna kuldakastsins sem nú stendur yfir. Rennslið um hitaveituæðar Veitna á höfuðborgarsvæðinu náði nýjum hæðum í dag þegar það náði 16 þúsund tonnum á klukkustund að jafnaði í sólarhring. Það er mesta notkun sem sést hefur. Gangi veðurspár eftir næstu daga getur þurft að skerða afhendingu til stórnotenda á heitu vatni; þeirra á meðal eru sundlaugarnar. Veitur eru í sambandi við rekstraraðila þeirra vegna stöðunnar.

Veitur hvetja almenning til að fara sparlega með heita vatnið

Veitur vinna nú samkvæmt viðbragðsáætlun og fyrsti þáttur hennar er að skora á fólk að fara vel með heita vatnið. Viðskiptavinum verður sendur tölvupóstur og frekari athygli vakin á stöðunni með auglýsingum og tilkynningum til fjölmiðla. Takist vel til getur það komið í veg fyrir að grípa þurfi til frekari aðgerða.

Holl ráð um húshitun

Um 90% af hitaveituvatni eru notuð til húshitunar. Fólk getur sparað heitt vatn og þar með kyndikostnað sinn með því að gæta að því að gluggar séu ekki opnir og útidyr ekki látnar standa opnar lengur en þörf er á. Þá skipta einnig máli stillingar ofna – að óþarflega heitt vatn renni ekki frá þeim – og að ofnarnir séu ekki byrgðir, til dæmis með síðum gluggatjöldum eða húsgögnum. Þá eru heitir pottar við heimili talsvert þurftafrekir á vatnið.

Á vefnum okkar er að finna góð ráð um heita vatnið, þ.e. hvernig fara má vel með.