Óvenjuleg lykt af heita vatninu í Vesturbæ

06. nóvember 2020 - 17:46

Veitum hafa borist ábendingar um óvenjulega lykt af heitu vatni í Vesturbæ Reykjavíkur. Ítarlegar greiningar eru í gangi á því hvað getur valdið, bæði hjá sérfræðingum hitaveitu sem og af öðrum sérfræðingum.

Strax voru gerðar mælingar á hitaveituvatninu í borholum í Lauganesi, frá geymum í Öskjuhlíð sem fæða Vesturbæinn og í dælustöð á Fornhaga. Mælt var brennisteinsvetni (H2S), súrefni (O2) og sýrustig (pH). Niðurstöður voru allar eðlilegar. Sýni hafa einnig verið tekin í heimahúsum, tönkum og dælustöðvum. 

Leitað var til Háskóla Íslands með frekari greiningar og niðurstöður þeirra hafa útilokað að um sé að ræða létt, lífræn leysiefni, svo sem terpentínu, bensín, dísilolíu og skyld efni. 

Vísbendingar eru um að lyktin sé að koma úr tilteknum borholum hitaveitu í Laugarnesi og hafa þær verið teknar úr rekstri. Talið er afar ólíklegt að skólp hafi borist í heita vatnið en hitaveitukerfið er rekið undir þrýstingi en fráveitan ekki sem þýðir að ef það er opið á milli þessara kerfa fer heitt vatn í fráveituna en ekki öfugt. 

Veitur biðja fólk sem finnur óvenjulega lykt af vatninu að láta vita, með skilaboðum á Facebook, með pósti á veitur@veitur.is, eða hringja í síma 516 6000.