Upplýsingagjöf Veitna vekur athygli

08. apríl 2021 - 14:25

Við erum afar stolt af því að fá tvær tilnefningar til Lúðursins, íslensku auglýsingaverðlaunanna. Veitur leggja mikið upp úr því að upplýsa þegar kemur að framkvæmdum og erum við sífellt að leita betri leiða til þess að ná til fólks.

Tilnefningarnar í ár eru annarsvegar fyrir umhverfismerkingar vegna framkvæmda í Tryggvagötu en þar er um að ræða samstarfsverkefni Veitna og Reykjavíkurborgar. Merkingarnar sem bera heitið „Endurspeglum mannlífið“ unnum við með auglýsingastofunni Tvist.

Hin tilnefningin er fyrir verkefni sem tengdist framkvæmdum í Bolholti. Þar lögðum við mikið upp úr því að upplýsa nágranna einnar gjöfulustu borholu okkar Reykvíkinga, RG-20, um hávaða þegar hún var hreinsiboruð svo koma mætti fyrir í henni nýrri, öflugri dælu. Það verkefni sem bar heitið „Heyrðu!“ var unnið með auglýsingastofunni Hvíta húsinu.

Að auki voru Veitur þátttakandi í herferð Umhverfisstofnunar, Samorku og Sambands íslenskra sveitarfélaga, "Piss, kúkur, klósettpappír", sem tilnefnd er undir flokknum Almannaheill og unnin var af Hvíta húsinu. 

Við þökkum fyrir ánægjulegt og gott samstarf í þessum verkefnum og lítum á þetta sem hvatningu í þeirri vegferð okkar að bæta sífellt upplýsingagjöf til viðskiptavina okkar.