Eftir langvarandi kuldatíð gera veðurspár nú ráð fyrir hlýnandi veðri á morgun. Í slíkum breytingum á veðurkerfinu getur myndast álag á fráveitukerfi vegna mikils vatnsflaums.

Neyðarlúgur geta opnast í svona aðstæðum

Fráveitukerfin eru hönnuð þannig að þegar öfgakenndar aðstæður í úrkomu og ofanvatni skapast þá virkjast neyðarlúgur í dælustöðvum og óhreinsað skólp rennur til sjávar. Þetta er mikilvægur þáttur í virkninni til að koma í veg fyrir að skólp komi upp um niðurföll í híbýlum fólks.

Það má því búast við því að neyðarlúgur opni í þessum aðstæðum sem fram undan eru. Þegar neyðarlúgur opna vinna Veitur samkvæmt skilgreindu verkferli sem m.a. felur í sér að fjörur verða gengnar og rusl hreinsað.

Í fráveitusjánni okkar er hægt að fylgjast með því hvort dæla hafi þurft óhreinsuðu skólpi út í sjó.

Rusl á ekki heima í klósettum

Nú sem endranær er fólk minnt á að einungis líkamlegur úrgangur og salernispappír eiga að fara í klósett. Rusli á aldrei að henda í klósett, sé það gert getur það endað í sjónum og skilað sér upp í fjörur.

Mikilvægt að hreinsa frá niðurföllum

Þá er mikilvægt að fólk tryggi hýbýli sín með því að hreinsa frá niðurföllum og tryggi að vatn komist sem greiðlegast frá húsum.