Hollráð um fráveitu

Klósettið er ekki ruslafata

Á hverjum degi fáum við gríðarlegt magn af rusli í hreinsistöðvar okkar. Mikil vinna og kostnaður felast í því að hreinsa dælur og farga ruslinu. Með því að minnka magn óæskilegra hluta/efna sem við sendum í fráveituna getum við lækkað kostnað verulega. Til viðmiðunar þá sturtum við fjórfalt meira niður af slíku en Svíar. Klósettið er ekki ruslafata, notum það rétt!

Martröð í pípunum

Blautþurrkan er þarfaþing og frábær í marga hluti. Það er ekki fyrr en í framhaldslífinu sem hún byrjar að gera óskunda. Blautþurrkur leysast nefnilega ekki auðveldlega upp og geta valdið tjóni ef þeim er hent í klósettið. Rör geta stíflast á heimilum með tilheyrandi vatnstjóni og kostnaði við viðgerðir, og hreinsibúnaður í fráveitukerfinu vinnur ekki á þessum þurrkum og fer illa í glímunni við þær.

Við bendum sérstaklega á að þó sumir framleiðendur taki fram á umbúðunum að blautþurrkurnar þeirra megi fara í klósettið þá er það ekki rétt. 

Þetta á að sjálfsögðu við um fleiri hreinlætisvörur:

Blautþurrkur	Bleyjur	Smokkar
Tannþráður	Túrtappar	Eldhúsbréf og trefjaklútar
Eyrnapinnar	Fita og olíur	Dömubindi

Í ruslið með þetta allt – það er hundleiðinlegt að fást við afleiðingarnar ef það ratar í klósettið.