Veituframkvæmdir taka oft langan tíma, raska daglegu lífi og eru dýrar. Í þessum hönnunarspretti leitum við leiða til að stytta framkvæmdatíma, bæta verklag og nýta tækni til að draga úr raski, spara tíma og lækka kostnað – án þess að fórna öryggi eða gæðum. 

Sprettinn leiðir Heimir Tryggvason, sérfræðingur í nýsköpun og tækniþróun hjá Veitum. 

Fita í fráveitukerfum veldur vandræðum. Hún getur valdið stíflum og er kostnaðarsöm fyrir samfélagið og umhverfið. Í dag er hún fleytt af og brennd – en við getum gert betur. Hönnunarspretturinn snýst um að finna leiðir til að draga úr fitu í fráveitunni og umbreyta henni í verðmæta auðlind. 

Sprettinn leiðir Egill Maron Þorbergsson, sérfræðingur í nýsköpun hjá Orkuveitunni. 

Margir vita lítið um eigin orkunotkun – og það getur verið kostnaðarsamt. Orka fer til spillis, gömul raftæki éta rafmagn og varmi nýtist illa á heimilum. Þetta þýðir hærri orkureikning fyrir fólk og aukið álag á orkuinnviði. Í þessum hönnunarspretti skoðum við hvernig við getum hvatt almenning, fyrirtæki og stofnanir til að fylgjast með, læra og nýta orku á skynsamari hátt. 

Sprettinn leiðir Silja Ingólfsdóttir, upplýsingafulltrúi Veitna.  

Hvernig tryggjum við að vatn, rafmagn og fráveita séu til staðar þegar stór hús og ný hverfi rísa? 

Hvernig tryggjum við að veituinnviðir eins vatn, rafmagn og fráveita séu tekin inn í dæmið í upphafi verkefna þegar stór hús og ný hverfi rísa? 

Stundum eru byggingaráform komin í ferli án þess að tryggt sé að innviðir fylgi með – að næg orka, vatn og fráveita séu í boði. Þetta getur leitt til tafar, aukins kostnaðar og lélegrar upplifunar fyrir íbúa. Í þessum hönnunarspretti leitum við leiða til að samhæfa áætlanir sveitarfélaga, framkvæmdaaðila og Veitna svo innviðir séu alltaf skrefi á undan og í takti við vöxt borgarinnar – með sjálfbærni og hagkvæmni að leiðarljósi. 

Sprettinn leiðir Margrét María Leifsdóttir, sérfræðingur í viðskiptastýringu hjá Veitum 

Í dag notum við hreint vatn til að sturta niður – dýrmæt auðlind sem ætti ekki að enda í skólptanki. Skólpið er flutt langar leiðir, regnvatn blandast við það og einnig hreint vatn úr ofnum heimilanna. Nútíma fráveitukerfi eru orkufrek, vatnssóun mikil og lausnirnar oft úreltar. 

En hvað ef við myndum hanna kerfið upp á nýtt? Kerfi sem þjónar fólki og náttúrunni. Í þessum hönnunarspretti förum við alla leið: skoðum hvernig fráveita framtíðarinnar gæti litið út – án óþarfa vatnsnotkunar, með skilvirkari flutningum, snjallri nýtingu auðlinda og sjálfbærri sýn. Sprettinn leiðir Megan Elizabeth Wiegmann, rekstrarstýra fráveitu hjá Veitum.  

Nýsköpunarfestival Veitna og Frumkvöðlaseturs Orkuveitunnar í Elliðaárstöð er 4 daga nýsköpunarhátíð þar sem um 100 manns koma saman til að leysa áskoranir sem tengjast orku og veitumálum. Á hátíðinni eru keyrðir fimm sprettir og þátttakendur taka þátt í skemmtilegri dagskrá og frá innblástur frá skapandi fólki. Andi nýsköpunar, gleði og skemmtunar mun svífa yfir vötnum í Elliðaárstöð og er stefnan á að þetta verði skemmtilegasta vinnuvika ársins!

Tökumst á við á raunverulegar áskoranir í orku- og veitumálum með samvinnu og sköpunarkraftinn að vopni.

Fjölbreyttur hópur fólks frá Orkuveitunni og dótturfyrirtækjum, samstarfsaðilar, fólk úr orkugeiranum, fagfólk, hönnuðir, listafólk, háskólanemar, verktakar, stjórnsýsla, frumkvöðlar taka þátt. Vilt þú vera með?  Skráðu þig hér.

Með því að vinna saman og leiða saman fjölbreyttan hóp er hægt að leysa raunverulegar áskoranir á stuttum tíma. Við vonumst til að niðurstaða sprettanna verði að raunverulegum verkefnum innan Veitna og Orkuveitunnar og séu raunverulegar lausnir við áskorunum sem við stöndum frammi fyrir.

Það er mikilvægt fyrir viðskiptavini og veitukerfin.

Aukum samvinnu, virkjum sköpunarkraftinn og stækkum tengslanetið.

Orkuveitan og Veitur eru þekkt fyrir það að leysa vandamál og má segja að nýsköpun sé í DNA-i fyrirtækjanna.

Hönnunarsprettur (e. design sprint) er aðferð sem notuð er til að finna lausnir og þróa vörur á stuttum tíma. Aðferðin er þróuð af Jake Knapp og er farið í gegnum fimm skref frá skilningi vandamáls til prótótýpu á mjög stuttum tíma.

Sérfræðingar eru fengnir að borðinu og kynna efnið fyrir þátttakendum og er lögð áhersla á lýðræðisleg vinnubrögð þar sem bestu hugmyndirnar eru kosnar áfram og haldið áfram að vinna með þær.

Afrakstur hönnunarspretts er einhversskonar prótótýpa sem er prófuð af notendum.

Í lok festivals verða lausnirnar kynntar og munu að minnsta kosti 2 verkefni verða fjármögnuð og komið til framkvæmda.