Borað eftir heitu vatni í Laug­ar­nesi

Reykjavík dregur nafn sitt af rjúkandi jarðhitavatni og víða um borgina eru borholur sem nýttar hafa verið til húshitunar í borginni áratugum saman. Gjöfult lághitasvæði er í Laugarnesinu sem sér hluta Reykvíkinga fyrir heitu vatni stóran hluta ársins. Fjölmargar borholur eru nú þegar í notkun í hverfinu, en mun fleiri eru til staðar þó þær séu ekki lengur nýttar.

Veitur eru í mestu jarðhitaleit á þjónustusvæðum sínum í hálfa öld vegna fólksfjölgunar því tryggja þarf öllum heimilum heitt vatn til framtíðar.

Í ágúst hefja Veitur undirbúning framkvæmda. Fyrirhugað er að bora nærri gatnamótum Kringlumýrarbrautar og Laugarvegs/Suðurlandsbrautar. Fyrsta borplanið verður sett upp í Bolholti og síðan á grasblett við Engjateig. Áætlað er að borun hefjist í september-október og það tekur um sex vikur að bora hverja holu.

Staðsetning á holunum var valin í samstarfi við ÍSOR og það er North Tech Drilling sem sjá um að bora eftir heita vatninu.

Sjálfbærni er okkur hjartans mál

Veitur hvíla lághitasvæðin á sumrin til að tryggja sjálfbæra nýtingu þeirra til framtíðar og nýju holurnar eru hugsaðar til að tryggja nægt vatn á mestu álagstímum. Þær munu einnig bæta rekstraröryggi hitaveitunnar til muna þegar þær hafa verið virkjaðar.

Borinn sem notaður er verður tengdur við dreifikerfi rafmagns því Veitur leita stöðugt leiða til að takmarka áhrif sín á loftslagið.

Við borun er notað vatn sem hreinsar borsvarfið upp úr holunni. Veitur sía grófasta efnið frá á borstað, en umfram vatni er veitt í gegnum fráveituna þar sem það fer í gegnum hreinsun í hreinsistöð Veitna áður en því er veitt út í sjó.

Kynning fyrir nágranna

Veitur munu boða til fundar fyrir íbúa og fyrirtæki í nágrenninu þann 18. Ágúst kl. 19.30 á Grand Hótel.

Tímaáætlun 2026

Bolholt
Undirbúningur: ágúst
Borun: september-október

Engjateigur
Undirbúningur: ágúst
Borun: september-október

Verkefnastjóri: Jón Örn Jónsson
Borverktaki: North Tech Drilling (NTD)
Samskipti: Silja Ingólfsdóttir hjá þjónustu Veitna

Spurt og svarað

Hvers vegna er notaður rafmagnsbor?
Rafmagnsbor er mun hljóðlátari en díselbor og veldur minni mengun og minni losun gróðurhúsalofttegunda.

Verður mikil umferð vegna framkvæmdanna?
Mest verður umferð í upphafi og lok framkvæmdanna þegar búnaður er fluttur til og frá svæðinu. Að öðru leyti verður umferð vegna framkvæmdanna lítil.

Mun framkvæmdin hafa áhrif á umferð?
Stundum getur þurft að stýra umferð gangandi, hjólandi og akandi vegfarenda. Lokanir verða eins takmarkaðar og kostur er og hjáleiðir vel merktar þegar þeirra er þörf.

Er borstaðurinn öruggur?
Já. Borstaðurinn verður girtur af og vaktaður allan sólarhringinn til að tryggja öryggi.

Hvað verður um vatnið sem notað er við borun?
Vatnið er notað til að flytja borsvarf upp úr holunni. Grófasta efnið er síað frá á staðnum og vatnið fer síðan í fráveitukerfið og í gegnum hreinsistöð Veitna áður en því er veitt út í sjó.

Getur borunin haft áhrif á hús eða mannvirki í nágrenninu?
Það er ekki er gert ráð fyrir því. Veitur þekkja engin dæmi hér á landi um að sambærilegar rannsóknarboranir hafi valdið skemmdum eða áhrifum á aðliggjandi húsnæði eða mannvirki.

Verður mikið rask á meðan borað er?
Það er ekki gert ráð fyrir því. Þó má gera ráð fyrir að tímabundið borplanið hafi áhrif á yfirborðið, en gengið verður frá því að framkvæmum loknum. Umferð vinnutækja verður í upphafi þegar undirbúningur stendur yfir og tímabundnar breytingar á umfreð. Veitur og verktakar leggja áherslu á að halda truflun í lágmarki.

Verða læti frá bornum?
Þeir sem búa eða starfa næst borsvæðinu geta orðið varir við lágt suð frá borun á dagtíma og einstaka hljóð þegar búnaður er settur upp.