Heitt vatn í miðri borg

Reykjavík dregur nafn sitt af rjúkandi jarðhitavatni og víða um borgina eru borholur sem nýttar hafa verið til húshitunar áratugum saman. Í Laugardalnum, þar sem nú er borað, er gjöfult lághitasvæði sem sér hluta Reykvíkinga fyrir heitu vatni stóran hluta ársins.

Fyrsta holan í Laugardalnum var einnig sú fyrsta sem var nýtt til húshitunar í Reykjavík árið 1928 þegar vatni var veitt frá Þvottalaugunum að Skólavörðuholtinu. Í dag eru níu holur í notkun í Laugardalnum sem sér 30% af Reykjavík vestan Elliðaáa fyrir heitu vatni að vetri til.  

Jarðhitaauðlindin í Laugardal getur gefið töluvert meira heitt vatn en hún gerir í dag. Vaxandi samfélag þarf meira heitt vatn til húshitunar og boranir við Engjateig eru hluti af því að nýta þessi verðmæti enn betur til framtíðar.  

Staðsetning á holunum sem nú á að bora var valin í samstarfi við auðlindasérfræðinga Orkuveitunnar og sérfræðinga ÍSOR. North Tech Drilling sjá um borunina.  

Sjálfbær notkun

Veitur hvíla lághitasvæðin á sumrin til að tryggja sjálfbæra nýtingu þeirra til framtíðar. Á sumrin kemur nægt vatn fyrir höfuðborgarsvæðið frá jarðvarmavirkjunum á Hellisheiði og Nesjavöllum. 

Orkan í heita vatninu 

Hitaveitan á höfuðborgarsvæðinu flytur margfalt meiri orku en rafdreifikerfið, allt að sex sinnum meira. Laugardalur færir íbúum 97 Megavött sem er um helmingur af mestu raforkunotkun árið 2025 á öllu höfuðborgarsvæðinu að álverinu í Straumsvík undanskildu.   

Nokkrar staðreyndir 

Bolholt 
Áætluð dýpt: 800-1200 metrar 
Upphaf borunar: Október 2026 
Nafn bors: VON 
Borfyrirtæki: North Tech Drilling 
Tegund borunar: Bein 
 
Engjateigur 
Áætluð dýpt: 1200-1500 metrar 
Upphaf borunar: Október 2026 
Nafn bors: RIG-16 
Borfyrirtæki: North Tech Drilling 
Tegund borunar: Ein bein og þrjár 20°skáboranir 

Fyrir frekari upplýsingar um boranir í miðri borg og reglulegar uppfærslur.