Heita­vatns­laust á stóru svæði í ágúst 

Heitavatnslaust verður í Kópavogi, Garðabæ, Hafnarfirði, Norðlingaholti, Breiðholti og á Álftanesi frá kl. 22 mánudaginn 19. ágúst þar til á hádegi miðvikudaginn 21. ágúst. 

Suduraed 1
Suðuræð 1

Hér verður hægt að fylgjast með framkvæmdinni á meðan henni stendur.  

Lokað verður fyrir flutningsæð hitaveitu, Suðuræð, sem flytur heita vatnið frá jarðvarmavirkjunum á stóran hluta af höfuðborgarsvæðinu.  

Verið er að tengja fyrsta áfanga Suðuræðar 2 við dreifikerfið og þá þarf að taka heita vatnið af. Áhrifin eru mikil á stórt svæði. Við munum nýta tímann og tækifærið vel og sinna öðrum aðkallandi verkum samtímis.  

Við skiljum vel að það komi sér illa fyrir íbúa og fyrirtæki að vera án heits vatns og við höfum skipulagt lokunina á þeim tíma þegar minnst notkun er á heitu vatni. Tenging stofnæða er stórt og tímafrekt verk en við munum kappkosta við að vinna það hratt og örugglega.  

Mánudagskvöldið 19. ágúst hefst vinna við að tæma heita vatnið af Suðuræð til að hægt sé að tengja nýju lögnina. Tæming tekur nokkrar klukkustundir og þá hefst vinna á fimm ólíkum stöðum í kerfinu. Við ætlum að bæta við búnaði, auka rekstraröryggi nýrra hverfa og sinna nauðsynlegu og fyrirbyggjandi viðhaldi í kerfinu. Viðamesta verkið er að tengja Suðuræð 2, en að því loknu verður heita vatninu hleypt á kerfið aftur hægt og örugglega.  

Gangi allt eftir áætlun ætti kerfið að hafa náð fullum þrýstingi um hádegisbil miðvikudaginn 21. ágúst. 

Markmiðið er að auka flutningsgetu hitaveitunnar til að allir íbúar á svæðinu hafi nauðsynlega innviði og lífsgæði til framtíðar.  

Hvernig getum við aðstoðað þig?