Afltoppurinn náði þá 215,3 megavöttum og er þá miðað við meðalálag einnar klukkustundar. Fyrra met upp á 212,9 megavött hafði staðið óhaggað frá desembermánuði 2008.
Raforkunotkun nær hámarki þegar saman fara mikil umsvif í samfélaginu, skammdegi og kuldi. Orkuskipti eru stór þáttur í því að notkunin hefur aukist en Veitur styðja dyggilega við þau í sinni starfsemi.
Veitur dreifa rafmagni til heimila og fyrirtækja í Reykjavík, Seltjarnarnesi, Kópavogi, Mosfellsbæ, hluta Garðabæjar og á Akranesi.
Frá upphafi Rafmagnsveitu Reykjavíkur fram til ársins 2008 mátti sjá veldisvöxt í raforkunotkun en eftir 2008 lögðust saman margir þættir til að draga úr notkun. Bankahrun með minnkuðum umsvifum, umbreyting lýsingar frá glóperum yfir í LED og sparneytnari heimilistæki svo helstu þættir séu nefndir. Jafnvel eftir að samfélagið náði sér á strik aftur með tilheyrandi fólksfjölgun þá varð ekki samsvarandi aukning í rafmagnsnotkun. Notkun á hvern íbúa lækkaði umtalsvert og mátti sjá raforkunotkun í grónum íbúðahverfum fara niður um tugi prósenta.
Annað skeið samdráttar í raforkunotkun hófst í nóvember 2018 og í gegnum byrjun heimsfaraldurs allt þar til á vormánuðum 2021 þegar varð verulegur viðsnúningur og raforkunotkun tók að aukast hratt fram til dagsins í dag.
Stór hluti skýringarinnar á aukinni rafmagnsdreifingu eru orkuskiptin en einnig fólksfjölgun, meiri umsvif í samfélaginu og mikill ferðamannastraumur. Reikna má með að lítil inneign sé enn eftir í frekari sparnaði heimilistækja og lýsingar. Hvað varðar orkuskiptin hafa Veitur m.a. stutt við uppbyggingu hverfa-, heima- og hraðhleðsla, unnið að landtengingu skemmtiferðaskipa og stutt fjölda fyrirtækja í sínum orkuskiptum.
Ef við skyggnumst inn í framtíðina þá sýna einfaldir útreikningar að með orkuskiptum og áframhaldandi fólksfjölgun má reikna með tvöföldun í raforkudreifingu hjá Veitum á næstu 20-30 árum. Slík aukning mun verða mikil áskorun en felur jafnframt í sér verulegan samdrátt í notkun jarðefnaeldsneytis, loftslaginu til góða.
Neysluvatn, hitaveita, rafmagn og fráveita eru lífsnauðsynlegir innviðir. Þetta eru grunnstoðir samfélagsins, forsenda öryggis, heilsu, atvinnuuppbyggingar og lífsgæða.
Nemar úr Listaháskólanum gera umhverfið notalegra með nýtingu afgangsvarma frá Veitum.